Математикийн олимпиадын бодлого бодох аргууд

Артур Энгел (Зохиогч), Бат-Орших. Д (Орчуулагч)
Математикийн олимпиадын бодлого бодох аргууд

0 үнэлгээтэй

Захиалгын код: MB2016051001
Хэвлэл: Анхны хэвлэл
Хэвлэгдсэн он: 2016
ISBN: 99973-3-745-0
Нүүрний тоо: 502
Хэмжээ/см/: 25.0 x 18.0 x 3.0
Статус: Зарагдаж дууссан
Үнэ: 22,000₮
Цаашид сонирхох

Тоо ширхэг:   Зарагдаж дууссан

Герман улсаас Олон Улсын Математикийн Олимпиадад оролцох багийг бэлтгэхийн зэрэгцээ 6 удаа сорил авах ажлыг 14 хоногт багтаах даалгавар надад нэг удаа тохиосон билээ. Тэр ажилдаа хэрэглэж байсан материалууд дээрээ түшиглэн энэхүү номыг бичив. Бид богино хугацаанд аль болох их зүйл судлахын тулд олимпиадын бодлогод тааралддаг "чухал санаануудыг " тусгасан маш олон бодлогын цуглуулгатай ажиллах хэрэгтэй болсон билээ.  

Бодлогуудыг ангилахад чухал санаанууд голлох үүрэгтэй байсныг энд зориуд онцлон тэмдэглэе. Одоо энэ ном ямар хүмүүст юуны түрүүнд зориулагдсан байж болох тухайд жагсаалт гаргаж үзье:

  • Математикийн бүх төрлийн уралдаан олимпиадад бэлтгэж буй сурагчид
  • Математикийн олимпиадад шавь нараа тогтмол бэлтгэдэг дунд сургуулийн багш нар
  • Математикийн тогтмол хэвлэл, сэтгүүлд долоо хоног, сарын бодлого болон судалгаа шинжилгээний чанартай асуудал дэвшүүлдэг математикчид
  • Бодлого бодох сонирхолтой эгэл жирийн математик сонирхогч нар байж болно.

Ном 14 бүлэгтэй. Бүлэг бүрийн эхэнд уг бүлгийн бодлогуудын гол санааг тусгасан жишээ бодлогуудыг бодолт тайлбартай нь орууллаа. Бүлгийн бодлогууд зарим нь бодолттой зарим нь хангалттай заавартай байгааг анхаарна уу. Ийм байдлаар номонд орох бодлого жишээний тоог 1300-г давуулан олшруулах боломж бүрдсэн билээ. Манай эрхэм уншигч бодлогуудын бодолттой танилцахаасааа өмнө өөрөө бодож үзвэл илүү өгөөжтэй байх ёстойг хүнээр хэлүүлэлтгүй мэдэх биз ээ.Номонд орсон бодлогуудыг бүх дэлхийн өнцөг бүрт болдог уралдаан тэмцээнээс шилж түүвэрлэсэн билээ. Олонхи бодлогууд нь хуучин ЗХУ, Унгар, барууны орнууд, Германы үндэсний олимпиадынх юм. Заримыг нь математикийн бодлогын тусгай булантай тогмол хэвлэлээс авлаа. Иймэрхүү учир шалтгаануудын улмаас бодлогын зохиогчийг тэр бүрчлэн зааж оруулахад учир дутагдалтай байлаа. Ямар ч хүн уран сайхан бодлоготой тааралдвал зохиогчийнх нь уран сэтгэлгээг гайхан биширдэг нь нууц биш. Гэтэл дараа нь уг бодлогын санаа цаг хугацааны хувьд түрүүлэн дэвшигдэж байсан нэгэн өөр бодлогонд таарах явдал бишгүй байдаг. Иймээс тухайн бодлогын зохиогчийг тодруулж олно гэдэг нь тийм амар биш ажил бололтой. Ер нь 25 жилээс өмнөх үеийн бодлогуудад зохиогчийг зааж өгөхөөс түдгэлзсэн билээ. Гэхдээ тухайн салбарын мэргэжилтнүүд ихэнхи бодлогыг хараад таньдаг болчихсон байдаг.

Математикийн бодлогууд нийтэлдэг ном хэвлэл тоогоо алдсан гэж болно. Шинээр гарсан ном бүхэнд шинэ бодлого байдаг ба ном зузаан болох тусмаа шинэ бодлогын тоо цөөрдөг гэсэн нэг зүй тогтол байдаг байх. Энэ номны бодлогуудыг дугаарлахдаа сонирхолтойгоор нь эсвэл хүнд хөнгөнөөр нь эрэмбэлэх бодлого баримталсангүй. Ер нь бодлогын хүнд хөнгөнийг үнэлнэ гэдэг хэцүү зүйлийн нэг байх. Олон Улсын Математикийн Олимпиадын шүүгчид ч сонгож буй бодлогын хүнд хөнгөнийг тогтоохдоо алдаа гаргах нь цөөнгүй байдаг. Олимпиадад оролцогч 400 гаруй хүүхдийн түвшинг дунджаар үнэлэх ямар ч боломж байхгүй. Тэднийг бэлтгэж байдаг хэдэн зуун багш нараас бүр их зүйл шалтгаалах нь мэдээж. Бэлтгэл хийх явцдаа ямар бодлого бодож байснаас хамааран зарим маш хүнд бодлого илэрхий бодлогын түвшинд очих магадлал ихтэй байж болно.

Энэ номын эхийг бэлтгэх явцад гэрийн болон ажлын компьютерт LATEХ-ийн олон хувилбарыг суулгаж зааварчилга өгсөн доктор Манфред Гратвоулд талархлаа илэрхийлж байна. Аливаа хүндрэл гарах бүрт тэрээр харамгүй зөвлөгөө өгч байсан билээ. Номонд алдаа байхыг үгүйсгэхгүй. Учир нь энэ номыг уншиж алдааг засах хамтрагч олдоогүй учраас бүх хариуцлагыг би дан ганцаар үүрч байгаа юм.

Номонд бүх төлөвлөсөн зүйлсээ оруулах боломж хомс байсан учраас зарим уншигчдын санаанд хүрэхгүй байж болох юм. Ахисан түвшний аргууд хангалтгүй орсоныг хүлээн зөвшөөрнө. Гэхдээ зах зээлд гарсан номнуудаас хамгийн бүрэн агуулгатай бөгөөд өгөөжтэй нь байж мэдэх юм шүү. Олон улсын олимпиадын хуучинсаг үзэлтэй шүүгчдий дуртай арга болох магадлал болон алгоритмын арга ороогүйг бас хүлээн зөвшөөрөх ёстой гэж бодож байна. Мөн олон улсын олимпиадад нэг их сонгогдож ордоггүй боловч Орос улсад ихэд дэлгэрсэн сэдэв болох тоглоомын тухай 13 дугаар бүлгийг эс тооцвол энэ номны бүх сэдвүүд олимпиадад байнга ордог гэж хэлж болно. Артур Энгел

Сэтгэгдэл оруулах

Таны нэр:


Таны сэтгэгдэл: Анхаар: Таны сэтгэгдэл зөвхөн энгийн текст хэлбэрээр харагдана!

Үнэлгээ: Муу           Сайн

Доорхи кодыг оруулна уу:



Бусад хамаарах ангилал: Математик